Մեծ գոհունակությամբ հայտարարում ենք, որ մեր տնկած առաջին ծառերը հասել են երկու մետր բարձրության։

«Շիրակամուտի անտառապատման տարածքում այս տարվա հունիսի սկզբին կատարած հերթական մոնիթորինգի ժամանակ ես մեծապես զարմացա՝ հայտնաբերելով մոտ 5 հա տարածք, որտեղ 2021թ. գարնանը տնկած ծառերը հասել էին երկու մետրի։ Խոսքը վայրի տանձենիների մասին է։ Կարևոր է հիշեցնել, որ մենք լեռներում ծառերը չենք ոռոգում, ուստի այս արդյունքն իսկապես բացառիկ է։» - կիսվում է տպավորություններով մեր հիմնադիր Անտրէ Գումուշճեանը։

Կարելի է նույնիսկ ասել, որ այս արդյունքն արտասովոր է։ Անտառի կայացման համար պահանջվում է անհավատալիորեն երկար ժամանակահատված, ինչը մենք՝ մարդիկս, դժվարությամբ ենք ընկալում։ Սովորաբար ծառերը երկու մետրի են հասնում 6-8 տարում, իսկ կաղնիների դեպքում՝ անգամ 10-15 տարում։

Պետք է գիտակցենք, որ անտառ ստեղծելը շատ դանդաղ գործընթաց է։ Անտառը միայն 10-20 տարի անց է սկսում հեռվից տեսանելի դառնալ, իսկ լիարժեք երիտասարդ անտառ կարող է համարվել ոչ շուտ, քան 30, իսկ շատ դեպքերում՝ միայն 50 տարի անց։ Սակայն առողջ անտառը կարող է հարատևել հարյուր հազարավոր տարիներ։ 

Դարձիր այս աճի մի մասը։
Քո աջակցությունը այսօր կօգնի փոքրիկ տնկիներին վերածվել շենացած անտառների, որոնք կապահովեն սերունդների ապագան։
Նվիրաբերիր հիմա։