Այս ամառ մենք իրականացրեցինք խնամքի կարևոր աշխատանք, որը հաճախ անտեսվում է, բայց վճռական նշանակություն ունի մեր երիտասարդ անտառների գոյատևման և աճի համար․ խոտքաղը։ Ընդհանուր առմամբ մենք խնամել ենք 312,845 ծառ, ինչը մեծ աշխատանք է և արժանի է ընդգծման։

Խոտքաղի աշխատանքները իրականացվել են Լեռնաջուր 1 և 2 տարածքներում (տնկված՝ 2023 թ․ աշնանը) և Լեռնաջուր 5 տարածքում (տնկված՝ 2024 թ․ աշնանը)։ Երկու տարածքներում էլ խոտերը խիտ ու բարձր էին աճել․ միջինը՝ 80 սմ, իսկ որոշ տեղերում հասնում էին մինչև 1․5 մետր։

Խոտքաղը միայն տարածքը մաքրելը չէ․ այն ապահովում է, որ երիտասարդ ծառերը ստանան ավելի շատ արևի լույս և տարածք աճելու համար, իսկ հողի փխրեցումը թույլ է տալիս, որ թթվածինը հասնի արմատներին՝ ամրացնելով դրանք ապագայի համար։ Այս կարևոր խնամքը երաշխավորում է, որ մեր ծառերը կաճեն և կզարգանան ամուր ու դիմացկուն անտառների։