Շուտով․ 170 հա նոր անտառ

Jrashen II

Jrashen IIՋրաշեն II-ն սկսում ենք 2022-ի նոյեմբերին

2022 թվականի հունիսի 10-ին Սպիտակ համայնքի ավագանին հաստատեց «Իմ անտառ Հայաստան»-ին անտառտնկման նպատակով հողատարածքի տրամադրումը 25 տարով անհատույց օգտագործման իրավունքով։ Արդեն 2022 թվականի հուլիսի 22-ին Սպիտակ համայնքի հետ կնքեցինք գույքի անհատույց օգտագործման պայմանագիր Ջրաշեն II տարածքի համար։

Ջրաշենի անտառապատման տարածքը բաժանված է երեք մասի։ Ընդհանուր տարածքը կազմում է 350 հա։ 2020 թվականի մարտի վերջին Շրջակա միջավայրի վրա ազդեցության գնահատմանը  ներկայացնելուց հետո Ջրաշենի անտառապատման տարածքը հաստատվեց Շրջակա միջավայրի նախարարության կողմից սեպտեմբերի կեսերին: Ջրաշեն I տարածքում անտառտնկումն ավարտեցինք 2022-ի գարնանը, և այժմ 110 հա-ի չափով ողջ տարածքում ծառերը տնկած են։

Նախապատրաստումն ու մարտահրավերները

Նախ կսկսենք տարածքի ցանկապատումը, որպեսզի կարողանանք սկսել անտառտնկումը 2022-ի աշնանը։ Ամբողջ տարածքը կազմում է 170 հա, իսկ բարձրությունը 2170-2450 մ է։ Այն հանդիպակաց է Ջրաշեն I տարածքին և ունի զգալի առավելություն՝ հյուսիսային դիրքը։ Սա նշանակում է որակյալ հող և բարձր խոնավություն։ Այստեղ տնկելու ենք կաղնի, սոճի, վայրի տանձ, և իհարկե, թփեր։

Թերությունը, սակայն, այն է, որ որոշ տարածքներ բավականին զառիթափ են։ Սա դժվարացնելու է թե՛ ցանկապատումը, թե՛ ծառատունկը։ Ինչևէ, մեր պրոֆեսիոնալ թիմը սիրում է մարտահրավերներ։ Մենք վճռականորեն գնում ենք դեպի հաջողություն։

Սա նաև Ձեր հնարավորությունն է

Դուք դեռևս հնարավորություն ունեք այս տարածքում ծառեր տնկելու։ Անգամ ֆիզիկապես ներկա լինելու կարիք չկա։ Պարզապես սեղմեք այստեղ և սկսեք տնկել ամեն ամիս։ Միայն պատկերացրեք, որ 20-25 տարի հետո Ձեր սեփական փոքրիկ անտառը տնկած կլինեք։ Սա Ձեր ամենաթանկ նվերը կլինի ապագա սերունդներին։